De la conversion de Saincte Eustelle, fille du Seigneur du pays.

Elle est fêtée le 11 mai (Occident) et le 30 avril (avec saint Eutrope, Église orthodoxe).

 Chapitre XV.

Sainct Eutrope alloit provignant l'Evangile en la ville de Sainctes et és marches circonvoisines, bien que sa résidence ordinaire fut en la montagne prés Sainctes ou il habitoit dans sa petite cabane, quand la foy qu'il preschoit print racine bien avant dans le coeur de la fille du Seigneur du pays; elle s'appelloit Eustelle.

Le vieux bréviaire, dressé à l'usage de l'Eglise de Sainctonge, appelle le père de saincte Eustelle Roy des Sainctongeois, et és leçons de S. Eutrope l'appelle Prince des Sainctongeois. Vincent en son Miroir historial luy donne le tiltre de Roy, peut estre par ce qu'il commandoit en souveraineté à la Sainctonge.

Toutes-fois le Cardinal Baronius l'appelle préfect des Gaules, qui estoient lors soumises à  l'Empire Romain, despuis les victoires de Jules Caesar emportées sur les Gaulois. Et ce que ce docte escrivain en dit est le plus probable, veu que lors il n'y avoit point de souverain en France, et la Royauté, qui fleurit il y a tant de siècles avec tant d'heur et de pouvoir, n'estoit pas encor establie.

C'estoit doncques ou le Préfect de toutes les Gaules , ou ce qui est plus vraysemblable le Préfect ou Président de la Sainctonge; la fille  duquel nommée Eustelle se convertit par la prédication de Sainct Eutrope.

Son père porta à regret la conversion de sa fille qu’il taxoit de légèreté, pour avoir renoncé à  la Religion de ses ayeulx à la semonce d'un homme estranger; de désobéissance, pour l'avoir fait sans avoir sur ce requis ladveu et consentement de son père.

Mais la Vierge repliquoit au contraire qu'elle ne pouvoit estre justement blasmée ny de légèreté,attendu qu'elle y avoit meurement pensé, considérant d'un esprit attentif la force des raisons dont ce divin Prédicateur affermissoit ses discours; non plus de désobéissance, veu que la lumière mesme naturelle monstre que la première et principale obéissance est deuë à nostre Créateur, qui du néant nous a faict sortir en estre, et par la providence nous y maintient et conserve. Quand doncques il parle, il doit estre le premier escouté, et quand il commande, il doit avant tous autres estre obéy. Sa loy règle toute autre loy, et comme de sa puissance dépend toute autre puissance, ainsi de sa volonté dépend toute autre volonté. « Et partant, luy dit-elle d'un grand courage, je n'ay point voulu requérir le consentement de personne pour suivre la voix et exécuter le commandement de celluy que je recognoy pour le Seigneur absolu de toutes choses. Que pleut à ce vrai Dieu vous communiquer la lumière dont il a esclaire mon âme, vous verriez soudain la tromperie de l'esprit d'erreur qui charme les esprits des infidelles, et détesteriez ce qu'ores vous embrassez si affectueusement.»

A ces parolles de S. Eustelle, son père se sentit de prim'abord esmeu d'indignation; toutes-fois espérant de pouvoir par douceur retirer sa fille de la loy de Jesus-Christ, tascha par caresses d'amollir la ferme constance de sa fille; mais l'amour de Jesus-Christ l'avoit tellement remparée que les affections humaines n'y avoient nul accez.

Le père, voyant la constance de sa fille, despouilla celle bénignité qu'il voyoit ne faire nulle impression au coeur de sa fille, et commença à  user de grosses parolles et de menaces, avec un regard d'un homme forcené, luy disant ce que la passion luy suggeroit.

La vierge oyoit ces menaces et ne s'en espouvantoit pas. Tant est puissante la grace de Dieu pour renforcer la foiblesse. Le Préfect, car désormais il ne semble mériter le nom de père à raison du mauvais traictement qu'il fit à  sa fille, regardant S. Eustelle d'un oeil estincellant de furie, haussant sa voix, il commanda à  quelques Gentils-hommes qui estoient la présens, de la mettre hors la maison puis qu'elle n'en vouloit pas recognoistre le maistre, avec deffense très-expresse de plus n'y r'entrer qu'elle n'eut changé d'opinion, et n'eut quitté la religion qu'elle avoit embrassé de nouveau.

Les Gentils-hommes, ayants tasché d'appaiser le courroux de leur seigneur, et voyants qu'il s'aigrissoit davantage sans vouloir ouyr aucune raison, obéirent quoy que à regret à son commandement et conduisirent S. Eustelle hors la maison, non sans beaucoup de larmes de toute la famille. Car qui n'eut regretté le départ d'une Vierge qui estoit comme le Soleil et la joye de toute celle maison, qui demeuroit en ténèbres et en tristesse par son absence.

Saint Eutrope (ou saint Eutropius) - Sainte Estelle de Saintes - Mediolanum Santonum <==.... 2 ....==> Du martyre de S. Eutrope. 30 avril de l’an 98

==> Archéologie : la légende de la Fontaine miraculeuse de Ste Eustelle de Saintes