Du martyre de S. Eutrope. 30 avril de l’an 98

15 janvier 2018

Chapitre XVI.

Le Christianisme alloit de jour en jour s'establissant en Saintonge par les vertueux exemples et sainctes prédications de S. Eutrope, quand la fin de sa vie approcha, pour commencer d'en vivre une plus parfaicte et plus heureuse. Il y avoit là long temps qu'il combattoit un bon combat, comme

l'apostre S. Paul dit de soy, car il estoit bien arrivé à l’age de quatre vingts ans ou environ, veu qu'il a esté martyrisé sur la fin de l'empire de Domitian qui finit l'an de nostre Seigneur 98. et nous pouvons estimer avec vray-semblance que la première fois qu'il vit nostre Seigneur, il estoit aagè de 16 ans ou environ lors que nostre Seigneur l'estoit de 32.

ainsi il sera aysé à un chacun de déduire au plus près l'aage de S. Eutrope. Ayant doncques longuement combattu contre le vice et contre l'infidélité, il estoit raisonable qu'il receut la couronne de gloire en tesmoignage de ses victoires. Mais Dieu voulut que tous ses combats fussent terminés par un combat et par une victoire, qui fut comme l'ouverture et entrée de son triomphe. Car Saincte Eustelle ayant esté chassée par

son père, et receuë par S. Eutrope, print logis non loing de la cabane du vénérable Evesque, lequel discourant des louanges de la virginité, enflamma tellement le coeur de la vierge du sainct Esprit, qu'elle se dévoua pour jamais à l'amour chaste du divin espoux Jesus-Christ, et se consacra à son service pour accompagner et en cette vie et en l'autre l'Agneau sans tache,

imitant en un corps corruptible la pureté et netteté des esprits

incorruptibles. grande force de la doctrine Evangélique qui va tellement séparant ce qui est de terrestre et d'impur au coeur humain d'avec ce qui est pur et céleste, qu'il reste espuré en un fin or de la virginité!

Le Père de saincte Eustelle, ayant sceu que sa fille s'estoit dédiée au service de Dieu avec voeu et promesse de ne jamais consentir Ã autres nopces qu'à celles qu'elle avoit desja célébrées en présence des Anges

toutes spirituelles et divines, commanda soudain qu'on luy amenat sa fille. Quelques Gentils-hommes, estant allés vers elle pour luy signifier la volonté de son père, eurent pour toute response qu'elle, estant Chrestienne et de surplus ayant fait voeu de virginité, ne vouloit retourner dans la maison ou Jesus-Christ son espoux estoit mesprisé et les Diables honnorez.

Les Gentils-hommes, voyants qu'ils ne pouvoient demouvoir de sa résolution, s'en retournèrent vers leur Seigneur, qui ayant ouy ce que sa fille avoit résolu et respondu, entra en une si grande furie qu'il cuida devenir forcené de rage, et tantost se despitant contre sainct Eutrope, tantost jettant de terribles menaces contre sa fille absente, tantost vomissant des blasphèmes à l'encontre de Dieu, d'un visage enflammé, d'un regard felon et esgaré, d'une voix bruyante, commanda qu'on luy appellast des meurtriers qui le vengeassent de l'affront que ses Dieux et luy recevoient par le mespris que Eustelle faisoit de leur religion et de son commandement.

Quelques-uns de ces coupe-jarrets sanguinaires ayant accouru vers luy, et se monstrants délibérez à mettre à mort celluy qu'il voudroit, luy bien ayse de leur prompte volonté, aiguisa la pointe de leur cruauté par quelques mots qu'il leur dit d'une voix entrecoupée de despit et de courroux, « Sus, s'escria-il, délivrez moy du plus grand ennuy que je sentis oncques. Mettez moy en repos et conservez moy la vie en l'ostant à celluy qui seroit cause de ma mort si je ne sçay bien tost qu'il n'est plus sur la terre.

Car je ne sçaurois vivre après un tel affront receu d'un homme estranger, si je n'en suis vengé. Allez et soudain on vous contera l'argent dont je veux récompenser le service que vous me fairés. Que je sçache au plustost que ce prescheur d'une nouvelle doctrine, qui a soustrait ma fille au culte des Dieux et à mon obéissance, aye reçeu la peine qu'il mérite.

Allez et ne craignez rien. C'est moy qui vous le commande.»

Les meurtriers, armez et embastonnez à mode de brigands, s'en vindrent de furie vers la maisonnette ou le S. Evesque faisoit sa demeure : il estoit lors en prière, haussant ses mains vers le Ciel pour la conversion entière des Saintongeois et s'offrant comme victime sacrèe pour estre immolé à son Dieu, quand il oyt un grand bruit; et cognoissant que l'heure tant désirée de son sacrifice approchoit, redoublant son affection, il eslança son coeur et sa parolle vers Dieu pour consacrer sa vie à celluy qui la luy avoit donnée, et pour recommander la conduite et conservation de son troupeau au souverain pasteur. Pendant que le S. Evesque d'une ardeur et piété incroyable s'achemine de désir vers le ciel, arrivent ces meurtriers.

De pleine arrivée ils ruérent contre luy des pierres qu'ils délaschoient de grande roideur. Le sainct se mit à genoux, les mains joinctes, d'un visage riant, d'un maintien vénérable. Eussiez vous point, ô meschants, esté amollis par la veuë d'un si grave et vertueux vieillard, si la malice n'eut empierré vos coeurs?

Nonobstant ils passent outre et l'ayant offensé par quelques coups de pierre qui l'assénèrent en divers endroits, ils se jettèrent sur luy, le frappants à coups de baston et non contents d'avoir commis tant d'insolences contre un personnage tant respectable, l'outragèrent encor d'escourgées , et après tout, pour assouvir leur rage l'un d'entre eux luy délascha un coup de hachette sur la teste dont il le playa profondément, fendant le test bien avant dans le cerveau.

Et à ce dernier coup l'ame du S. Evesque et glorieux martyr sortit de la prison de son corps pour s'envoler en liberté comme la colombe entre les bras de son Seigneur, portée par les aisles d'une vie irréprochable et d'une mort glorieuse. Ainsi finit ses jours cest homme Apostolique, généreux en sa vie et invincible en sa mort, confirmant par l'effusion de son sang la doctrine qu'il avoit preschée d'exemple et de parolle. Grand prédicateur, grand Evesque, grand Martyr.

Les meurtriers, bien joyeux d'avoir massacré le sainct homme, se retirèrent vers le préfect, luy portant les nouvelles de l'exécution faicte par eux.